Powdersuche in Utah, zweiter Teil

Eusi erschti Nahbegegnig mit emne Elch bzw. enere Elchin. Sie isch plötzlich vor eus uf d'Langlaufloipe usegloffe...schono es imposants Tier wenns 5m vor eim staat (au ohni Gweih).

In Amerika isch alles e chli andersch - unter anderem au d'Tannzäpfe!

Die letscht Skitour in Utah i de Garden City Meadows. E chli Pulver hämmer da also tatsächlich no gfunde - aber kein Vergliich zu Jackson.

Und au a dem Tag isch es wieder chalt gsi, wie die Schneekristall uf de Bäum zeiged.

Und das wärs au scho wieder gsi mit Triggs und Gäggs bzw. mit Skitüürle in Utah. Als negschts gahts wieder zrugg uf good old Sun Valley und dänn uf Seattle.

Auf Powdersuche in Utah

Well's Wätter in Jackson denn weder schlächter worde esch, hemmer d'Suzy weder belade ond send rechtig Süüde gfahre, om de sageomwobnig Utah Champagne Powder z'fende.. Aber zerscht mal semmer no in Salt Lake City verbii. De Bibi ehre Gebori semmer denn am abig no imene chinesische Resturant go fiire. Well d'Motels in Salt Lake City aber liecht öber üsere Priisklass gsi send ond mer metem ganze religiöse Kitsch rond ome Temple Square ned vell hend chönne afange, semmer denn am nöchschte Tag weder es betz nach Norde ond hend üses Base Camp imene Motel 6 in Ogden ufgschlage..

Am nöchschte Tag hemmer denn eigentlech welle go Türele, send denn aber glii weder omkehrt, wells i de Bärge horizontal gschneit hed. S'Alternativprogramm (es Lob uf die rollend Planig) hed sech denn aber grad so kuhl usegstellt: Antelope Island! En zemlech grossi Insle zmetzt im Great Salt Lake, wos schiinbar emmer no Antilope ond vor allem frei läbendi Bisons z'gseh ged.

De Great Salt Lake esch werklech zemlech salzig, da uf dem Fotti gsehd mer grad d'Strass wo öberen Damm uf d'Insle gohd. Lenks vom Damm hed s'Wasser en Salzghalt vo öppe 14 % (es ged Stelle im See wo's bes zo 25% Salz denne hed!), rächts (dete wo's au gfrore esch) nome (..) öppe 5 %. D'Ozean hend en Salzghalt vo öppe 3.5 % (Wikipedia, 2008). 

Mer hend denn sogar au es paar Bisons gseh! Zom Teil sogar vo nöcher als üs lieb gsi esch, well die blöde Viecher zmetzt ufem Wanderwäg Pause gmacht hend.

S'Liecht ond d'Stemmig send werklech seeehr idröcklech gsi. D'Bisons natürlech au. 

Jackson Hole

Rund um Jackson häts endlich mal wieder es paar imposanti Berge gha (Teton Range). Natürlich hämmer eus grad informiert, wo mer dänn da überall go Skitürle chan.

Leider hät s'Wetter dänn nöd eso mitgspielt. Drum hämmer nume e chlineri Tour vom Teton Pass us gmacht. De Usgangsort isch so beliebt, dass es nach em 10i kein freie Parkplatz meh git (selbscht wenns schneit und windet wie a dem Tag). Und meh lauft eifach mit de Skischueh ufe wie me uf em Foti gseht. Mier händs zerscht mit Fäll probiert - isch aber z'müehsam gsi, wils kei Ufstiegsspur gha hät usser die steili und direkti, wommer nume mit Skischueh ufe chunnt.

De windig Ufstieg hät sich dänn zum Glück glohnt: De Pulver isch 1a gsi und wommer wieder uf de Passstrass gsi sind, hät eus grad de erschti Pick-up wieder uf d'Passhöchi ufe mitgnoh.

Jackson isch nöd nume bekannt wäg sine Berge, sondern au wäg de viele Hirsch wo im Winter da i d'Ebeni abe chömmed. Vo dene tuusige vo Hirsch sammled sich natürlich jedes Jahr au einigi tuusig Gweih a. Us dene macheds da dänn z.B. so tolli (!) Torböge. Wooow!

Natürlich hämmer die Hirsch no vo Nächem welle gseh. Da in Jackson gits nämlich eis vo de wenige Wildreservat, wo's Füehrige ine git.

Is Reservat chunnt meh nume per Pferdeschlitte (wommer da im Hintergrund gseht). D 'Hirsch lönd sich vo dem nöd gross beidrucke und äsed eifach gmüetlich wiiter.

Reservat bedütet aber nöd, dass d'Hirsch da wie imene goldige Chefig läbed. Es hät au Koyote und Wisschopfadler ume, wo sich gärn über d'Reschte vo de alte oder chranke Tier härmached.

s' stolze Wappetier vo de USA (wo sich vor allem vo Aas und Roadkill ernährt...)

No meh 'iirsche! Im Winter sind d'Kämpf übrigens nöd eso ernscht gmeint, wil grad nöd Paarigsziit isch und sich d'Wiibli in separate Herde ufhaltet.

Uf eusere zweite Skitour in Jackson isch s'Wetter einiges besser gsi. Mier sind uf de Vorgipfel vom Maverick ufegloffe, wo sich im Teton National Park befindet. Nach einere Stund Flachstieg und zwei Stund Ufstieg hämmer eus uf en super Abfahrt gfreut...

... und sind nöd entüscht worde!

West Yellowstone

In West Yellowstone gets em Wenter vor allem eis: Schneemobil.. Met dene chönnt me sogar in Yellowstone National Park inefahre, wämer hondert dollar vörig hett. Osser Schneemobil ond vell vell Schnee gets in West Yellowstone aber eigentlech nüt me anders.

D'Schneemobiler (bzw. Töfflibuebe) döfed da sogar uf de Strasse omefahre, was doch rächt müehsam esch, wemmer metem Auto onderwägs esch.

Üs hend die Schneemobil langsam so ufe Wecker gäh, dasmer d'Schii packt hend ond en Schiiwanderig i Yellowstone Park ondernoh hend. Wildi Tier hemmer leider kei gseh (osser Änte) aber d'Landschaft esch einewäg megaschön gsi.

wie meh uf dem Bild da gsehd (ond uf no es paar anderne, wo wie emmer uf üsem Webalbum z'gfende send..)

Es Fürabebier hemmer üs denn redlech verdient gha.. Die grössti Attraktion vo West Yellowstone (ämel för üs) esch nämlech en Microbrewery gsi. Natürlech hemmer üs denn grad schnell müesse dörs aktuelle Sortimänt vo de Wolf Pack Brewery trenke.. I de USA gets nämlech au seeeeehr feins Bier, me daf eifach ned Bud Light ond so trenke (osser me hetti gärn es Mineralwasser..)

Naches paar Täg West Yellowstone ond emene Schlächtwätterusflog nach Big Sky, Montana, semmer denn weder wiiterzoge. Dör ändlosi Wälder ond Schneehüüfe rechtig Jackson Hole, Wyoming.

Sun Valley zum Zweiten

Allne alles gueti im noie Jahr!!!

Nachdem mer s'noie Jahr i de Bars ond Pubs vo Ketchum gfiired hend (Föttelis dezue wie emmer uf üsem Picasa-Album), semmer am 2. gmüetlech uf Galena go Schneeschüele.

I de Galena Lodge (Kafi ond Restaurant) hets näbem feine ässe ond em beschte Kafi i de Gägend au Hönd zum uslehne! Die Loaner Dogs send vom Animal Shelter in Ketchum ond chömed eso in Gnuss vo regelmässige Spaziergäng. Natürlech hemmer üs die Glägeheit ned loh entgoh loh ond send denn am Namitag met de Sadie loszoge.

D'Sadie hed de wäg eh besser kennt als mer ond drom esch sie ehnder met üs go spaziere als omgekehrt... 

Aber streichle hed mer sie erscht chönne, nachdem sie ganz erschöpft gsi esch vor luuter im Tüfschnee ometolle ond omenandsprenge.

Am nöchschte Tag hemmer denn metem Martin ond de Julie en Usflog zom Redfish Lake gmacht.

D'Schneeschueh hemmer zwar debi gha, aber bruucht hed mer si ned werklech, well d'Strass vo de Holzfäller-Rattragg schön planiert gsi esch.

Impressione am wäg..

Nachere guete Stond laufe semmer denn ändlech bim See acho. Obviously frozen..

Ond denn esch ändlech de grossi Schnee cho... Nach öppe de vierte Stormwarnig hetts öber Nacht guet 8 inches Schnee gäh. Am nöchschte Morge esch drom ganz Ketchum scho am Morge früeh bi de Left agstande ond hed gwarted bes alli Lawinehäng vo de Ski Patrol gsprängt worde send. Nach guet enere Stond astah hends üs ändlech ufegloh: POWDER!!!

Nach zwoi Woche Luxus in Sun Valley hets üs doch weder wiiterzoge. Also hemmer üsi Sebesache packt...

... ond d'Suzy usgschufled ond send Rechtig Yellowstone ufbroche. Meh Gschechte vo Elch ond Schneemobil folged...!